ਬਾਲੀਵੁੱਡ ਦੇ ਚੋਟੀ ਦੇ ਅਦਾਕਾਰ ਧਰਮਿੰਦਰ ਦਾ 24 ਨਵੰਬਰ ਨੂੰ 89 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਬਾਅਦ ਦੁਪਹਿਰ ਮੁੰਬਈ ਦੇ ਵਿਲੇ ਪਾਰਲੇ ਸ਼ਮਸ਼ਾਨਘਾਟ ਵਿੱਚ ਕੀਤਾ ਗਿਆ। ਧਰਮਿੰਦਰ ਦਾ ਜੱਦੀ ਘਰ ਲੁਧਿਆਣਾ ਦੇ ਸਾਹਨੇਵਾਲ ਪਿੰਡ ਵਿੱਚ ਹੈ। ਉਨ੍ਹਾਂ ਦੇ ਪਿਤਾ ਕੇਵਲ ਕਿਸ਼ਨ, ਉਸੇ ਪਿੰਡ ਦੇ ਸਰਕਾਰੀ ਸਕੂਲ ਦੇ ਹੈੱਡਮਾਸਟਰ ਸਨ। ਅੱਜ, ਪੂਰਾ ਦੇਸ਼ ਜਿਨ੍ਹਾਂ ਨੂੰ “ਹੀ-ਮੈਨ” ਵਜੋਂ ਜਾਣਦਾ ਹੈ, ਉਨ੍ਹਾਂ ਨੇ ਸਾਹਨੇਵਾਲ ਵਿੱਚ ਆਪਣਾ ਬਚਪਨ ਬਿਤਾਇਆ, ਜਿਥੇ ਉਨ੍ਹਾਂ ਦ ਘਰ ਅੱਜ ਵੀ ਉਹੋ ਜਿਹਾ ਹੈ। ਧਰਮਿੰਦਰ ਦੀ ਮੌਤ ਦੀ ਖਬਰ ਸੁਣਦੇ ਹੀ ਉਨ੍ਹਾਂ ਦੇ ਪੂਰੇ ਪਿੰਡ ਵਿਚ ਮਾਤਮ ਪਸਰ ਗਿਆ।
ਹਾਲਾਂਕਿ, ਉਨ੍ਹਾਂ ਨੇ ਆਪਣਾ ਜੱਦੀ ਘਰ ਵੇਚ ਦਿੱਤਾ ਹੈ ਅਤੇ ਉੱਥੇ ਇੱਕ ਨਵਾਂ ਘਰ ਬਣਾਇਆ ਗਿਆ ਹੈ। ਬਾਹਰਲੇ ਬੋਰਡ ‘ਤੇ ਅਜੇ ਵੀ “ਧਰਮਿੰਦਰ ਹਾਊਸ” ਲਿਖਿਆ ਹੈ। ਗੁਆਂਢੀਆਂ ਦਾ ਕਹਿਣਾ ਹੈ ਕਿ ਧਰਮਿੰਦਰ ਭਾਈ ਦੂਜ ‘ਤੇ ਇੱਥੇ ਆਉਂਦੇ ਸਨ। ਉਹ ਹਮੇਸ਼ਾ ਸਰਕਾਰੀ ਸਕੂਲ ਜਾਂਦੇ ਸਨ ਅਤੇ ਨੇੜਲੇ ਡੇਰੇ ਵਿੱਚ ਲੱਸੀ ਜਰੂਰ ਪੀਂਦੇ ਸਨ।
ਉੱਥੇ ਰਹਿਣ ਵਾਲੀ ਇੱਕ ਬਜ਼ੁਰਗ ਔਰਤ ਮਾਇਆ ਨੇ ਕਿਹਾ ਕਿ ਉਹ ਅਤੇ ਧਰਮਿੰਦਰ ਬਚਪਨ ਵਿੱਚ ਇਕੱਠੇ ਖੇਡਦੇ ਸਨ। ਜਦੋਂ ਵੀ ਧਰਮਿੰਦਰ ਆਉਂਦੇ ਸਨ, ਉਹ ਉਨ੍ਹਾਂ ਨੂੰ ਰੱਖੜੀ ਬੰਨ੍ਹਦੀ ਸੀ, ਪਰ ਹੁਣ ਉਹ ਕਹਾਣੀ ਖਤਮ ਹੋ ਗਈ ਹੈ। ਇਹ ਕਹਿੰਦੇ ਹੋਏ ਮਾਇਆ ਦੀਆਂ ਅੱਖਾਂ ਵਿੱਚ ਹੰਝੂ ਆ ਗਏ।
ਧਰਮਿੰਦਰ ਕੁਝ ਸਮੇਂ ਤੋਂ ਉਮਰ ਨਾਲ ਸਬੰਧਤ ਬਿਮਾਰੀਆਂ ਤੋਂ ਪੀੜਤ ਸਨ। 10 ਨਵੰਬਰ ਨੂੰ ਉਨ੍ਹਾਂ ਨੂੰ ਸਾਹ ਲੈਣ ਵਿੱਚ ਤਕਲੀਫ਼ ਹੋਣ ਲੱਗੀ ਅਤੇ ਉਨ੍ਹਾਂ ਨੂੰ ਮੁੰਬਈ ਦੇ ਬ੍ਰੀਚ ਕੈਂਡੀ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ। ਇਸ ਦੌਰਾਨ ਉਨ੍ਹਾਂ ਨੂੰ ਵੈਂਟੀਲੇਟਰ ‘ਤੇ ਰੱਖਿਆ ਗਿਆ ਸੀ। ਧਰਮਿੰਦਰ ਨੂੰ 12 ਨਵੰਬਰ ਨੂੰ ਹਸਪਤਾਲ ਤੋਂ ਛੁੱਟੀ ਦੇ ਦਿੱਤੀ ਗਈ। ਉਨ੍ਹਾਂ ਦਾ ਪਰਿਵਾਰ ਅਤੇ ਡਾਕਟਰਾਂ ਦੀ ਇੱਕ ਟੀਮ ਘਰ ਵਿੱਚ ਉਨ੍ਹਾਂ ਦੀ ਦੇਖਭਾਲ ਕਰ ਰਹੀ ਸੀ।
ਧਰਮਿੰਦਰ ਦੇ ਸਾਹਨੇਵਾਲ ਸਥਿਤ ਪੁਰਾਣੇ ਘਰ ਦੇ ਮਾਲਕ ਸੰਦੀਪ ਨੇ ਕਿਹਾ ਕਿ ਇਹ ਘਰ ਸਾਹਨੇਵਾਲ ਦੀ ਪਛਾਣ ਹੈ। ਉਨ੍ਹਾਂ ਨੇ ਆਪਣਾ ਬਚਪਨ ਇਸ ਘਰ ਵਿੱਚ ਬਿਤਾਇਆ ਅਤੇ ਇਸਦੇ ਪਿੱਛੇ ਉਹ ਸਕੂਲ ਹੈ ਜਿੱਥੇ ਉਨ੍ਹਾਂ ਨੇ ਪੜ੍ਹਾਈ ਕੀਤੀ। ਉਨ੍ਹਾਂ ਦੇ ਪਿਤਾ ਕੇਵਲ ਕਿਸ਼ਨ ਵੀ ਇਸੇ ਸਕੂਲ ਵਿੱਚ ਅਧਿਆਪਕ ਸਨ। ਉਨ੍ਹਾਂ ਨੇ ਇਹ ਘਰ ਡੇਢ ਸਾਲ ਪਹਿਲਾਂ ਖਰੀਦਿਆ ਸੀ।
ਇਹ ਵੀ ਪੜ੍ਹੋ : ਪੰਜਾਬ ਦੇ 3 ਸ਼ਹਿਰਾਂ ਨੂੰ ‘ਪਵਿੱਤਰ ਸ਼ਹਿਰ’ ਦਾ ਦਰਜਾ, ਇਥੇ ਨਹੀਂ ਹੋਵੇਗੀ ਸ਼ਰਾਬ-ਮੀਟ, ਤੰਬਾਕੂ ਦੀ ਵਿਕਰੀ
ਉਸ ਤੋਂ ਪਹਿਲਾਂ ਇਸਦਾ ਮਾਲਕ ਰਾਮਦਾਸ ਮਾਸਟਰ ਸੀ, ਜਿਸ ਤੋਂ ਉਨ੍ਹਾਂ ਨੇ ਇਹ ਘਰ ਖਰੀਦਿਆ ਸੀ। ਸੰਦੀਪ ਅੱਜ ਵੀ ਘਰ ਉੱਤੇ “ਧਰਮਿੰਦਰ ਹਾਊਸ” ਲਿਖਵਾਇਆ ਹੋਇਆ ਹੈ, ਕਿਉਂਕਿ ਇਹ ਘਰ ਪਿੰਡ ਦੀ ਪਛਾਣ ਹੈ। ਜਦੋਂ ਵੀ ਲੋਕ ਇੱਥੇ ਆਉਂਦੇ ਹਨ, ਉਹ ਇਸ ਨੂੰ ਜ਼ਰੂਰ ਦੇਖਦੇ ਹਨ। ਇਹ ਘਰ 90 ਗਜ਼ ‘ਤੇ ਬਣਿਆ ਹੈ ਅਤੇ ਲੋਕ ਇਸ ਨੂੰ ਦੇਖਣ ਲਈ ਦੂਰੋਂ-ਦੂਰੋਂ ਆਉਂਦੇ ਹਨ। ਪੁਰਾਣੇ ਘਰ ਦੀ ਇੱਕ ਫੋਟੋ ਘਰ ਦੇ ਬਾਹਰ ਵੀ ਲਗਾਈ ਗਈ ਹੈ।
ਵੀਡੀਓ ਲਈ ਕਲਿੱਕ ਕਰੋ -:
The post ਧਰਮਿੰਦਰ ਦੇ ਜੱਦੀ ਪਿੰਡ ‘ਚ ਪਸਰਿਆ ਮਾਤਮ, ਪੁਰਾਣੀਆਂ ਯਾਦਾਂ ਚੇਤੇ ਕਰ ਰੋ ਪਈ ਮੂੰਹਬੋਲੀ ਭੈਣ appeared first on Daily Post Punjabi.