ਸੀਬੀਆਈ ਨੇ ਸ਼ੁੱਕਰਵਾਰ ਨੂੰ ਆਈਸੀਆਈਸੀਆਈ ਬੈਂਕ ਦੀ ਸਾਬਕਾ ਐਮਡੀ ਅਤੇ ਸੀਈਓ ਚੰਦਾ ਕੋਚਰ ਅਤੇ ਉਸ ਦੇ ਪਤੀ ਦੀਪਕ ਕੋਚਰ ਨੂੰ ਕਰਜ਼ਾ ਧੋਖਾਧੜੀ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤਾ ਹੈ। ਦਰਅਸਲ ਚੰਦਾ ‘ਤੇ ਬੈਂਕ ਦੀ ਨੀਤੀ ਅਤੇ ਨਿਯਮਾਂ ਦੇ ਉਲਟ ਜਾ ਕੇ ਕਰੋੜਾਂ ਰੁਪਏ ਦਾ ਕਰਜ਼ਾ ਦੇਣ ਦਾ ਦੋਸ਼ ਹੈ।
ਦੱਸ ਦੇਈਏ ਕਿ ਆਈਸੀਆਈਸੀਆਈ ਬੈਂਕ ਅਤੇ ਵੀਡੀਓਕਾਨ ਦੇ ਸ਼ੇਅਰਧਾਰਕ ਅਰਵਿੰਦ ਗੁਪਤਾ ਨੇ ਪ੍ਰਧਾਨ ਮੰਤਰੀ, ਰਿਜ਼ਰਵ ਬੈਂਕ ਅਤੇ ਸੇਬੀ ਨੂੰ ਪੱਤਰ ਲਿਖ ਕੇ ਵੀਡੀਓਕਾਨ ਦੇ ਚੇਅਰਮੈਨ ਵੇਣੂਗੋਪਾਲ ਧੂਤ ਅਤੇ ਚੰਦਾ ਕੋਚਰ ‘ਤੇ ਇੱਕ-ਦੂਜੇ ਦਾ ਪੱਖ ਲੈਣ ਦਾ ਦੋਸ਼ ਲਗਾਇਆ ਹੈ।
ਇਸ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਧੂਤ ਦੀ ਕੰਪਨੀ ਵੀਡੀਓਕਾਨ ਨੂੰ 2012 ਵਿੱਚ ਆਈਸੀਆਈਸੀਆਈ ਬੈਂਕ ਤੋਂ 3250 ਕਰੋੜ ਰੁਪਏ ਦਾ ਕਰਜ਼ਾ ਦਿੱਤਾ ਗਿਆ ਸੀ ਅਤੇ ਬਦਲੇ ਵਿੱਚ ਧੂਤ ਨੇ ਚੰਦਾ ਕੋਚਰ ਦੇ ਪਤੀ ਦੀਪਕ ਕੋਚਰ ਦੀ ਵਿਕਲਪਕ ਊਰਜਾ ਕੰਪਨੀ ‘ਨੁਪਾਵਰ’ ਵਿੱਚ ਆਪਣਾ ਪੈਸਾ ਨਿਵੇਸ਼ ਕੀਤਾ ਸੀ। ਦੋਸ਼ਾਂ ਤੋਂ ਬਾਅਦ, ਚੰਦਾ (59) ਨੇ ਅਕਤੂਬਰ 2018 ਵਿੱਚ ਆਈਸੀਆਈਸੀਆਈ ਬੈਂਕ ਦੇ ਸੀਈਓ ਅਤੇ ਐਮਡੀ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ।
ਦਰਅਸਲ, ਵੀਡੀਓਕਾਨ ਗਰੁੱਪ ਦੇ ਚੇਅਰਮੈਨ ਵੇਣੂਗੋਪਾਲ ਧੂਤ ਦੇ ਚੰਦਾ ਕੋਚਰ ਦੇ ਪਤੀ ਦੀਪਕ ਕੋਚਰ ਨਾਲ ਚੰਗੇ ਕਾਰੋਬਾਰੀ ਸਬੰਧ ਸਨ। ਇਹੀ ਕਾਰਨ ਸੀ ਕਿ ਵੀਡੀਓਕਾਨ ਗਰੁੱਪ ਦੀ ਮਦਦ ਨਾਲ ਬਣਾਈ ਗਈ ਕੰਪਨੀ ਦਾ ਨਾਂ ਦੀਪਕ ਕੋਚਰ ਦੇ ਪਿਨੈਕਲ ਐਨਰਜੀ ਟਰੱਸਟ ਦੇ ਨਾਂ ‘ਤੇ ਰੱਖਿਆ ਗਿਆ ਸੀ। ਵੇਣੂਗੋਪਾਲ ਧੂਤ ਨੇ ਦੀਪਕ ਕੋਚਰ ਦੀ ਇਸ ਕੰਪਨੀ ਰਾਹੀਂ ਵੱਡੀ ਰਕਮ ਦੀ ਠੱਗੀ ਮਾਰੀ ਹੈ।
ਦਸੰਬਰ 2008: ਵੀਡੀਓਕਾਨ ਦੇ ਐਮਡੀ ਵੇਣੂਗੋਪਾਲ ਧੂਤ ਨੇ ਚੰਦਾ ਕੋਚਰ ਦੇ ਪਤੀ ਦੀਪਕ ਕੋਚਰ ਨਾਲ ਮਿਲ ਕੇ ਨਿਊਪਾਵਰ ਰੀਨਿਊਏਬਲਜ਼ ਪ੍ਰਾਈਵੇਟ ਲਿਮਟਿਡ ਕੰਪਨੀ ਬਣਾਈ। ਕੋਚਰ ਪਰਿਵਾਰ ਅਤੇ ਧੂਤ ਦੀ ਇਸ ਵਿੱਚ 50-50 ਹਿੱਸੇਦਾਰੀ ਸੀ। ਦੀਪਕ ਕੋਚਰ ਨੂੰ ਇਸ ਕੰਪਨੀ ਦਾ ਮੈਨੇਜਿੰਗ ਡਾਇਰੈਕਟਰ ਬਣਾਇਆ ਗਿਆ।
ਜਨਵਰੀ 2009: ਧੂਤ ਨੇ ਨਿਊਪਾਵਰ ਦੇ ਡਾਇਰੈਕਟਰ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ। ਉਸਨੇ ਆਪਣੇ 24,999 ਸ਼ੇਅਰ ਵੀ 2.5 ਲੱਖ ਰੁਪਏ ਵਿੱਚ ਨਿਊਪਾਵਰ ਨੂੰ ਟ੍ਰਾਂਸਫਰ ਕੀਤੇ।
ਮਾਰਚ 2010: ਦੋਸ਼ ਹੈ ਕਿ ਧੂਤ ਨੇ ਆਪਣੀ ਸਮੂਹ ਕੰਪਨੀ ਸੁਪਰੀਮ ਐਨਰਜੀ ਪ੍ਰਾਈਵੇਟ ਲਿਮਟਿਡ ਰਾਹੀਂ ਨਿਊਪਾਵਰ ਕੰਪਨੀ ਨੂੰ 64 ਕਰੋੜ ਰੁਪਏ ਦਾ ਕਰਜ਼ਾ ਦਿੱਤਾ।
ਨਵੰਬਰ 2010: ਧੂਤ ਨੇ ਕੋਚਰ ਦੀ ਨਿਊਪਾਵਰ ਕੰਪਨੀ ਨੂੰ ਲੋਨ ਦੇਣ ਵਾਲੀ ਸੁਪਰੀਮ ਐਨਰਜੀ ਵਿੱਚ ਆਪਣੀ ਹਿੱਸੇਦਾਰੀ ਮਹੇਸ਼ਚੰਦਰ ਪੁੰਗਲੀਆ ਨੂੰ ਸੌਂਪ ਦਿੱਤੀ।
ਅਪ੍ਰੈਲ 2012: ਰਿਪੋਰਟ ਮੁਤਾਬਕ ਵੀਡੀਓਕਾਨ ਸਮੂਹ ਦੀਆਂ ਪੰਜ ਕੰਪਨੀਆਂ ਨੂੰ ਅਪ੍ਰੈਲ 2012 ਵਿੱਚ 3250 ਕਰੋੜ ਰੁਪਏ ਦਾ ਕਰਜ਼ਾ ਦਿੱਤਾ ਗਿਆ ਸੀ। ਗਰੁੱਪ ਨੇ ਇਸ ਕਰਜ਼ੇ ਦਾ 86 ਫੀਸਦੀ ਯਾਨੀ 2810 ਕਰੋੜ ਰੁਪਏ ਦੀ ਅਦਾਇਗੀ ਨਹੀਂ ਕੀਤੀ। ਇਸ ਤੋਂ ਬਾਅਦ 2017 ਵਿੱਚ ਕਰਜ਼ੇ ਨੂੰ ਐਨਪੀਏ (ਨਾਨ ਪਰਫਾਰਮਿੰਗ ਅਸੇਟਸ) ਐਲਾਨ ਦਿੱਤਾ ਗਿਆ ਸੀ।
ਸਤੰਬਰ 2012: ਪੁੰਗਲੀਆ ਨੇ ਧੂਤ ਤੋਂ ਐਕੁਆਇਰ ਕੀਤੀ ਸੁਪਰੀਮ ਐਨਰਜੀ ਕੰਪਨੀ ਦੀ ਹਿੱਸੇਦਾਰੀ ਦੀਪਕ ਕੋਚਰ ਦੀ ਅਗਵਾਈ ਵਾਲੀ ਪਿਨੈਕਲ ਐਨਰਜੀ ਟਰੱਸਟ ਨੂੰ ਤਬਦੀਲ ਕਰ ਦਿੱਤੀ। 94.99 ਫੀਸਦੀ ਹੋਲਡਿੰਗ ਵਾਲੇ ਸ਼ੇਅਰ ਸਿਰਫ 9 ਲੱਖ ਰੁਪਏ ‘ਚ ਟਰਾਂਸਫਰ ਕੀਤੇ ਗਏ। ਇਸ ਤਰ੍ਹਾਂ ਸੁਪਰੀਮ ਐਨਰਜੀ ਤੋਂ ਮਿਲੇ 64 ਕਰੋੜ ਰੁਪਏ ਦੇ ਕਰਜ਼ੇ ਦਾ ਕੋਈ ਮਤਲਬ ਨਹੀਂ ਰਹਿ ਗਿਆ।
ਇਹ ਵੀ ਪੜ੍ਹੋ : ਚੀਨ ‘ਚ ਵਿਗੜੇ ਹਾਲਾਤ, ਇੱਕ ਦਿਨ ਵਿੱਚ ਸਾਢੇ 3 ਕਰੋੜ ਤੋਂ ਵੱਧ ਲੋਕਾਂ ਨੂੰ ਹੋਇਆ ਕੋਰੋਨਾ!
ਈਡੀ ਨੇ 3 ਸਾਲ ਪਹਿਲਾਂ ਚੰਦਾ ਕੋਚਰ ਦੀ 78 ਕਰੋੜ ਰੁਪਏ ਦੀ ਜਾਇਦਾਦ ਕੁਰਕ ਕੀਤੀ ਸੀ। ਇਨ੍ਹਾਂ ਵਿਚ ਉਸ ਦਾ ਮੁੰਬਈ ਘਰ ਅਤੇ ਉਸ ਨਾਲ ਜੁੜੀਆਂ ਕੰਪਨੀਆਂ ਦੀਆਂ ਜਾਇਦਾਦਾਂ ਸ਼ਾਮਲ ਹਨ। ਈਡੀ ਦੇ ਅਧਿਕਾਰੀਆਂ ਨੇ ਕਿਹਾ ਸੀ ਕਿ ਕੋਚਰ ਖ਼ਿਲਾਫ਼ ਮਨੀ ਲਾਂਡਰਿੰਗ ਰੋਕੂ ਕਾਨੂੰਨ (ਪੀਐਮਐਲਏ) ਤਹਿਤ ਕਾਰਵਾਈ ਲਈ ਵਾਰੰਟ ਜਾਰੀ ਕੀਤਾ ਗਿਆ ਸੀ। ਇਸ ਤਹਿਤ ਕੋਚਰ ਦੇ ਮੁੰਬਈ ਫਲੈਟ ਅਤੇ ਉਨ੍ਹਾਂ ਦੇ ਪਰਿਵਾਰ ਨਾਲ ਸਬੰਧਤ ਇਕ ਕੰਪਨੀ ਦੀਆਂ ਜਾਇਦਾਦਾਂ ਨੂੰ ਜਾਂਚ ਏਜੰਸੀ ਨੇ ਅਟੈਚ ਕੀਤਾ ਸੀ।
ਵੀਡੀਓ ਲਈ ਕਲਿੱਕ ਕਰੋ -:
“‘ਮੈਂ ਆਪਣੇ ਪਿਓ ਦੀ 11 ਮਹੀਨੇ ਤੋਂ ਆਵਾਜ਼ ਵੀ ਨਹੀਂ ਸੁਣੀ, ਜੇ ਤੁਸੀਂ ਕੁਝ ਨਹੀਂ ਕਰਨਾ ਤਾਂ ਮੈਨੂੰ ਦਵੋ ਇਜਾਜ਼ਤ’ “
The post ICICI ਬੈਂਕ ਦੀ ਸਾਬਕਾ MD ਤੇ CEO ਚੰਦਾ ਕੋਚਰ ਪਤੀ ਸਣੇ ਗ੍ਰਿਫ਼ਤਾਰ, ਲੋਨ ਫ੍ਰਾਡ ਦਾ ਮਾਮਲਾ appeared first on Daily Post Punjabi.